Гребина А., "Дась лу!" газетлэн редакторез
Тӥ куриды вал...
«ТУЖ ПОТЭ ПУМИСЬКЕМЕ В. РОМАНОВЕН», — Алнаш районысь Асаново школаысь Лариса МАРДАНОВАЛЭН сыӵе куронэн гожтэтэз редакцие август пумын гинэ вуиз. Но Владимир Васильевичен пумиськыны мылкыд каремзэе вераса гожъязы вал лыдӟисьёсмы азьло но. Ма, солэн аслаз но туж потэ вал тросгес пиналъёсын пумиськылэмез, литературной кружоке ветлӥсьёслы юрттэмез. Республикаысьтымы, озьы ик Татариысь, Башкириысь кӧня школаосы вуылӥз со!
— Кытын ай табере «Дась лу!» газетлэн праздникез ортчоз? — капчи мылкыдын юалоз вал со.
Зэм но, редакциын ужасьёсын ӵош кылем дышетскон арын гинэ вить праздникъёсмы пӧлысь ньыляз ветлӥз: Глазове, Кизнере, Балезиное, Пичи Пургае. Вавоже но мынысал, но ӵап больницае тупаз. Берло командироваосысь бертыса но шуиз: «Алнашын но, Юкаменскын но одно ик орчытом, соос пумит ӧвӧл.»
Туж быгатыса лыдӟылӥз аслэсьтыз кылбуръёссэ, нош макем шумпотылӥз, пиналъес аспӧртэмлыко рифма шедьтыку! Со дыре ик туж сюлэмшугъяськиз, удмурт литературамес тросэз ляб тодо шуыса. Соин но, дыр, удмурт литературалы 100 ар тырмонэн валче газет бамамы ӵектӥз «Ӟардон» викторина ялыны, ачиз ик малпаз троссэ юанъёссэ. Берло дыре со трос архивъёсын. Озьы утчаськыса, газет баме вуттӥз Кедра Митрейлэсь берло дыре печатласькымтэ «Мон-А-Чим» но «Пичи дышетӥсь» нимо веросъёссэ, «Эш-Тэрек» трагедиезлэсь люкетсэ, Г. Верещагинлэсь «Батыр дӥсь» поэмазэ, газетмылэн историеныз тодматыны тыршыса усьтӥз «Дась лу!»-лы — 60» рубрикаез. Со мылысь-кыдысь ужалляз пиналъёслэн гожтэтъёсынызы, «Нырсетӥ вамышъёсмы» баме быгатыса дасялляз соослэсь кылбуръёссэс. Со дыре ик юн кусып возьылӥз «Молот» но «Кизили» журналъёсын, «Советской Удмуртия» газетэн, радиоен но телевидениен, дыртылӥз заводъёсысь рабочийёс , гуртъёсын тыршисьёс, библиотекаосын лыдӟиськисьёс, «Колосс» кинотеатре кино учкыны лыктэмъёс доры… Ог кутске ке, оло, уез-нуналэз но уг шӧды ни, лэся. Шутэтскон нуналъёсты но вунэтылӥз.
Вераса быдтонтэм трос вал В. Романовлэн азьланезлы но планъёсыз. Малпа вал Ува районэ П. Блиновлэн вордскем интыосаз вуылыны, «Дась лу!» газет сярысь книгаез дасяны юрттыны, Шор Постолэ мыныса, литературной кружоке ветлӥсьёслэсь поттэм бордгазетъёссэс эскерыны, УдГУ-ысь студенткаен З. Рябинаен ӵош солэсь кылбуръёссэ сэрттыны-пертчыны, Н. Лопатиналэн издательствое сётэм рукописез бордын автореныз ӵош ужаны. «Эскере литературной кружокады» рубрикае «Кык «Палэзьпуос» нимо статьязэ йылаз-пумаз вуттыны, выль кылбуръёс гожтыны, дасьёссэ печатланы дасяны. Но…ӧз вутты. Ми но дыраз ӧм вуттэгазет бамын солэсь улэп кылзэ сётыны, кылбурчи сярысь пыр-поч мадьыны, солэн малпанъёсыныз тодматыны…
