Романова Г.
Яратонмы но одӥг вал...
Трос аръёс ӵоже одӥг липет улын улэм, жӧк сьӧрын пукем адями сярысь гожтыны туж секыт. Сое тон туж ӟеч тодӥськод кадь потэ, нош умой-умой чакласькод, син азяд пуктӥськод солэсь выросъёссэ, вераськемзэ, быдэс улэм-вылэмзэ но шуак луиськод, аслыд ачид шуиськод: мон сое туж ӧжыт тодӥсько-валасько вылӥськем. Таӵе малпанэ вуи мон, Владимир Васильевич Романов сярысь тодэ ваёнъёсме гожтыны пуксьыкум.
Милемыз тодматӥз, ваче кариз, шуыны луоз, кылбур дунне. Мон школаын дышетскыкум ик ас поннам кылбураны вырисько вал. Соосты редакциосы ӧй лэзья, нокинлы ӧй возьматъя — кепыранэ уг лэзьы вал, лэся. Нош 1968-тӥ арын (мыным соку дас тямыс арес гинэ вал али), Соцгородокын общежитиын улыкум (соку ужай строительствоын), ми доры лыктӥз журналист Матильда Иванова. Со юаз, ӧвӧл-а, пе, пӧлады гожъяськисьёсты. Мон шуи, кӧня ке, пӧй, вырисько. Со учкиз, гожъямъёсыным тетрадьме редакцие басьтӥз. Собере асме но ӧтизы.
«Советской Удмуртия» газетысь культура отделэн соку кивалтэ вал Николай Васильев. Со ик луиз мынам нырысь редакторе. М. Ивановаен басьтэм кылбуръёсыным но веросъёсыным тетрадьме со умой-умой учкыса потэм. Ваньмыз сярысь тупен-тупен валэктыса сётӥз но отысь одӥг веросме но кык кылбурме газетэ поттыны дасялом шуиз. Шумпотэм сюлэмы инмозь ӝутскиз. Иське, гожъямме быдэс Удмурт шаер лыдӟоз!
Тӥни озьы мон сюрес лёги «Советской Удмуртия» газетэ. Отын ужасьёс инмаръёс кадь пото вал мыным, но берло дыши, лэся. Кылбур гожтӥсько ке, соку ик дыртӥсько ини редакцие.
Одӥг пол озьы культура отделэ лыктыкум пыризы «Дась лу!» газетын ужасьёс. Тодматскимы, собере кудзы ке шуизы:
— Тодӥськод-а, милям вань кылбурчимы, фамилиез тожо Романов, ӵыжы-выжыед ӧвӧл меда?
Мон шӧдӥ исаськыса, серекъяса вераськемзэс. Соин нокыӵе ӧй кариськы. Нош соос уг буйгало:
— Со милям тожо кышнояськемын ӧвӧл на. Айда тодматомы.
Кужмысь сямен монэ «Дась луэ!» нуизы. Уг тодӥськы ни, мар вераським соку Володя Романовен. Одӥгез гинэ син азе пуксе на: шорам учкизы быдэс мугорме портӥсь синъёс. Мон амалтэк ӵыжектӥ, керпотонэ гомӟиз. Возьдаськемме шӧдыса, лэся, Володя капчияк вазиз но сокугес гинэ потэм «Мынам тулысэ» кылбуръёсын нырысь сборниксэ кузьмаз. Мон эшшо но кепырай: улонам нырысьсэ пумитасько книга гожтӥсь муртэ! 70-тӥ аръёсы туж сӥлы каро вал гожъясьёсты, нош книга поттыны быгатэм муртэ — тужгес но. Дӥсьтытэк кутӥ векчи гинэ кылбур книгаез. Собере Володя монэ редакциысь потон ӧсозь келяз, кытын улэмме юаз. Улӥськомы вылэм одӥг палан, общежитиосмы но чылкак артэ. Тӥни озьы со ми доры общежитие ӵемысь вуылыны кутскиз. Ми, егит нылъёс, сое шумпотыса пумиталлямы, маке пӧраськом ке, оскалтыны ӧтьылӥмы. Озьы Володя Романов милям эшмы луиз. Со ке луэ, быдэс комнатае югыт пыре вал кадь. Оломар но серекъян-мактан шедьтоз, маке но мудронзэ, олокытын-олоку ортчем учыръёсты вералоз. Ми шӧдӥськом вал, со троссэ будэтыса вера шуыса, но егитъёслы серекъян гинэ мед луоз. Комнатаысьтым нылъёс вожъяськыса шуо вал: «Однако, тузи туган кутэмед!» Озьы ке но шуылӥзы, визьмы маза ӧз сётылы: чакласькы, адӟиськод ук, со дышетскемын, визьмо, нош тон кин — огшоры строитель, серекъялоз но кельтоз, собере аресэн но со тынэсьтыд сизьым ареслы бадӟым ук, кышнояськон вакытэз ортчем маке. (Со вакытэ кызь вить аресъем кышнояськымтэ пияш шоры малы ке но кырыжгес учко вал — умой мурт, пе, отчыозь огназ уз улы). Нош сюлэмылэн визьмылэсь чик но кылзӥськемез уг поты, Володя доры куриське. Ӝамдэ дорамы уг ни ке ветлы, кытчы пырон инты уг шедьтӥськы ни. Кӧня меда уйёсты изьытэк потылӥ мон соку! Соин пумиськемелэсь азьло яратон сярысь кылбуръёс гожъялляй, нош табере кылбурен йырин чик ӧвӧл ни. Сюлэм висе, куректэ, йыре нокыӵе чуръес уг пыро, суйпыд но юскиськемын. Володя сое ваньзэ шӧдэ вал, дыр, ог-огенымы со сярысь ӧм вераськылэ ке но.
Володяен ми ӵемысь киное ветлылӥм. Одӥг пол кино бере Ленин нимо ураметӥ пыдын бертӥськом. Учкем фильммы сярысь вераськиськом. Ӵемысь малпанмы огкадь уг луы, споръяськиськом. Собере Володя мынэсьтым шуак юа:
– Кылзы ай, тынад фамилиед мынам кадь — Романова. Нош айы нимыд кызьы?
– Васильевна.
– Ого, пе, ини. Эн вераськы. Мынам тожо ведь Васильевич. Уд алдаськы-а?
Табере мон пайми ини озьы тупамезлы но юай:
– А ку-о вордӥськиды, кыӵе толэзе?
– Нырысетӥ августэ.
– Мон —22 августэ.
Чал-чал кариським. Кыкнамы ас поннамы малпаськиськом. Мынам мугор юзыр-кезьыр луиз: ӟечлы-а меда та? Но егит мылкыд кема уг ӝожомы. Володя нош маке серемзэ вераз, мон пальпотӥ. Соин угось ноку но мӧзмыт ӧй вал. Быземелэсь азьло одӥг пол гинэ урод мылкыдзэ адӟи – ӵужанаез кулэм бере.
Ми туж ӵем ветлылӥм нюлэскы, Володя инкуазез яратэ вал, пичи мурт сямен паймылӥз, шумпотылӥз писпулы, губилы, узы-борылы. Тодӥсько на, вазь тулыс Каменной нюлэскы сморчки но строчки октыны ветлӥм. Милям со самой яратоно губимы вал. Мон ветлӥсько, вуж куаръёс улысь учкылӥсько. Оло синмы уг адӟы, оло губиез ӧвӧл. Нош Володя весь шедьтэ но шедьтэ, ымдурыз пельдорозяз пальыша, нюлэс тыр кеське:
– Ох, чебер! Ох, тузӥ!
Мынам бӧрдэме ик потэ ини. Возьыт пияш азьын. Соку Володя адӟиз мӧзмыт тусме но дышетэ:
– Тон музъем вылысь вуж ӝутӥськем куарез учкылыса ветлы, озьы губи мычиське.
Верамезъя ик лэсьтӥ, мынам но посудае тулыс губиен тырмиз.
Озьы Володяен кык ар пала эшъяськыса улӥм. Со дыр куспын олокыӵе но вакытъёс вал. Куддыръя туж зол вожме но поттылӥз, но озьы ке но, Володя кадь умоез но чеберез нокин уг поты вал. Кыкнамы ик гожъяськиськомы ке но, кылбуран сярысь ум вераськиське вал. Одӥг пол малы ке возьматэме потӥз кылбурме, ушъямзэ кылэме потӥз, лэся, нош со серекъяса тазьыгес шуиз:
– Ма, кылбур-а та? Не ритмикаез, не рифмаез ӧвӧл. Школаын тӥледыз чик-а мар-а ӧз дышетэ кылбуранлы?
Мон йырме мыкыртӥ.
– Учкы ай, учкы, нырыд музозь вуэ ук ини,– гор-гор серектӥз но зыгыртӥз:
– Таӵе шузиез но яратоно вылэм!
Собере вераны кутскиз нырысь яратонзэ. Солэн но нимыз Галя вылэм. Институтын ӵош дышетскиллям. Володяез армие басьтэмзы бере, со мукетызлы бызем. Мон, пе, вылтусын туж кельшисько со Галяезлы.
Ми общежитиын одӥг комнатаын улӥськом вал куать нылъёс. Эшъёсы ваньзы бызьылыны кутскизы, собере мон чылкак огнам кыли. Соку ужасько вал ини «Советской Удмуртия» газетын, корректор луыса. Кошкем, бызем ӟеч эшъёсы интые вуизы мукет егит нылъёс. Но соос чылкак пӧртэмесь вал – тамак кыско, вина юо, шуш кылъёсын верасько. Общежитиын улэме ӧз поты ни. Со сярысь Володялы верай.
– Ма, иське, ойдо ӵош кариськом улыны, квартирае потом, – малпамтэ шорысь шуиз со.
Озьы ми ЗАГС-э заявление сётыны мынӥм. Отын ужасьёс паспортъёсмес учкизы но вордскем сярысь свидетельствомес вайыны косӥзы. Оло, тӥ, пе, сузэрен братъёс луиськоды. Вайим. Заявление сётӥмы.
Редакциын ужасьёс милесьтым ӵош кариськеммес кудӥз шумпотыса, кудӥз вожъяськыса пумитаз. Тросэз нылкышноос Володялы бызёнлэсь алылӥзы. Со, пе, ассэ гинэ яратӥсь адями, ассэ гинэ визьмо каре. Озьы шуэмзылэн кӧня ке шонерез но вал. Куддыръя Володя угось яратэ вал адямиез возьытэ вуттыны яке серекъяны. Но ӵемысь со озьы лэсьтылӥз, азязы ик вералляз адямилэн кыӵе ке шекез вань ке. Оло, сокем лэчыт кулэ ӧй вал, дыр. Но Володя со Володя ини — вераз ке, ӵогоз, кема сюлмад улоз.
Мон нокинлэсь ӧй кылзӥськы, бызи. Дунне вылысь самой шудо адями вал, дыр. Гожтӥськонамы лыктӥзы «Дась лу!» газетысь, оло, вань ужасьёс, лэся. «Советской Удмуртиысь» но эшъёсы вал.
Кыӵеен кылиз мыным со нунал? Ачим шудо бере, вань адямиос ӟеч мылкыдо, умоесь пото вал.
Гожтӥськонмес пусйыса, юондыр ортчытӥмы мынам улон общежитиям. Озьы ик сюан нерге лэсьтӥзы гуртын анай-атае. Мемелы но дяделы эмеспизы туж яраз. Ма, быдэс гурт калыклы яраз.
Тодӥсько на, та юондыръёсын тросэз пограллязы, нош Володя кочон кадь сазь ветлӥз. Сектаськисьёслэсь виназэс ымдураз пичияк вуттоз но пальышак потоз:
– Ой, укыр курыт винаед, кенак, пограло но кышноме лушкалозы.
Мынам вордӥськем гуртам туж ӵем бертылӥськомы вал. Меме но дяде котьку витизы, шумпото вал вуэммылы. Соку ик быдэс корка ӵыжы-выжыосмы люкасько. Володя ваньзылы маке шуныт кыл вералоз, серекъятоз. Озьы капчи ортчылӥз ӝыт. Пичиен-пичиен пукем вина ӟузьылӥзы. Меме тодэ вал, Володя кузь виятэмзэ, небытсэ яратэ шуыса.
– Соин, лэся, кудӟисез ӧз луылы. Нош дяде но Володя куддыръя ӵукнаозь озьы вераськыса пукылӥзы. Дяде али ке но со вакытэз ӵем тодаз вайылэ но лулӟылэ: «Эх, Володя, Володя эмеспи, кыӵе адями тон вал! Быдтӥд ук улонэз, быдтӥд, аслэсьтыд но, нылылэсь но быдтӥд!» Мон но со шудо аръёсты али туж берыктысал на, соос весяклы кылизы чебер вож садо но сяськаё шулдыр выжыкыл дуннеен.
Верай вал ини, ми улыны потӥм квартирае шуыса. Улон интымы туж пичи вал, жыныез музъ еме гудыса лэсьтэмын, укноосыз мунчолэн быдӟаесь гинэ. Кузёосмы улӥзы вӧл-вӧл бадӟым коркан, вылӥын. Юылыны ярато вал. Сыӵе дыръя педло поталлязы корказы ведрае. Кудӟем маоске со ведразэс ӵемысь кисьтылӥзы но пож вузы ми вылэ виялляз. Сыӵе дыръя Володя чус-чус луылӥз, йыр бордаз кутскылӥз но ас понназ сямен шуылӥз: «Огшоры пӧрмостэм, визьтэм адямиос но ӟеч квартираосын уло, нош асьмеос ку адямие потом ини?..»
Улыны ӵош кариськыкумы, мон туж нодтэм вал али. Володяез анай-атай интыын адӟи. Сотэк, солэсь юатэк номыр карыны, номыр лэсьтыны ӧй дӥсьтылы. Воже яке ӝоже потэ ке, пичи мурт кадь нырме ошисько вал. Соин но, лэся, Володяен ӵош, одӥг юртын ужамы ке но, редакциын со монэн ассэ туж кезьыт возьылӥз. Отын мон солы вазьылыны но куддыръя ӧй дӥсьтылы. Нош дорамы лыктэм эшъёсыз азьын монэн шунтэм вой кадь вал. Коньдон но Володя киынгес возиськылӥз. Озьы ик луоно кожасько вал, лэся. Квартираын улыкумы ик ӵемгес но ӵемгес юылыны кутскиз. Но юылӥз кӧс вина гинэ. Малпай, пиналмы вордӥськиз ке, ваньмыз воштӥськоз.
Туж витисько вал пи вордӥськемез. Озьы ик луиз. Дяде но меме шумпотӥзы, эмеспимы кадь ик, не, визьмо но чебер мед луоз, ним но Вова поном. Мон ӧй пумитъяськы.
Володя но яратӥз пимес. Пичи мурт кадь со котьмаизлы паймылӥз но шумпотылӥз. Соку гинэ вордскем мае ке кунултӥз кутоз но гадь вылтӥз _ пыдыныз нуллоз вал. Соиз валаса сямен пыдзэ вошъялляз.
– Уть, кыӵе чырткем экемы! Эй, эй, ветлы, пие, ветлы! «Бадӟым будод, тӥр кутод, тэле мынод кырӟаса, бадӟым кызэз погыртод, сое ваёд кораса...»
Тазьы нёръяса кырӟамез зэмлы пормиз. Пимы матысь но асьмеос кадь ӧз буды, литературалэсь туж кыдёкын. Сямын но мукет. Котькызьы турттӥ ке но, дышетскемез ӧз поты. Ужа заводын, «тӥр» интые кияз «молот» кутӥз.
Пимылы квартираын шоканы секыт вал. Со вордӥськиз тулыс. Гурез эстӥськод но, коркан мунчоын кадь пӧсь луылӥз, нош час-кык ортчыса - гуын кадь кезьыт. Вордӥськемез бере кык толэзь ортчыса, пимы висьыны кутскиз, соин больницае выдоно луиз.
Больницаысь потыса, пимес кутӥмы но Татарие, Володялэн анаез доры, Удмурт Ташлые кошким. Со отын огназ улэ - пимылы но чылкыт омыр ӟечлы луоз, анаймылы но мӧзмыт уз луы. Озьы мон ӝыны ар пала пиеным Татариын улӥ.
Володя доры соку кыкетӥзэ бертӥм вал ини, анайзэ но кыкетӥзэ адӟи ай. Нош гожтӥськонамы но, сюанамы но Володя анайзэӧбз ӧтьы. Малызэ мыным ӧз вера вал.
Нырысьсэ гуртазы бертон азямы мон Володялэсь ӵыжы-выжыоссэ ваньзэс сямен син азям пуктыны быгатӥсько вал кадь ини. Соос сярысь Володя олокызьы но мактаса, выросъёссэс ик возьматыса вералляз.
Тодӥсько на, гуртазы вуэм бере, Володя посӥськыса, возьдаськыса мыным шуиз:
– Тӥни милям коркамы, куро липетэнэз. Быдэс гуртын – огназ гинэ сыӵе корка вань на.
Куро липетэн ке, куро липетэн. Мыным маке шат. Ас поннам пайми солэн возьдаськемезлэсь. Нош коркаос ваньмыз юг-юг тӧдьы буямын, чик висъяны уг луы выльзэ вужезлэсь — коръёссы уг адӟисько. Володялэн вордскем, будэм коркаез но мыным чебер, йӧно адӟиськиз.
Корка доразы вуыкумы, пумитамы анаез потӥз. Соку гинэ турнамысь бертэм вылэм: пӧсям йырсиез вальк-вальк сынамын, ымныраз ӵыжыт пырем. Егит адӟиське на.
– Ой, ой!— куалектӥз со.— Номыри но дась ӧвӧл! Ма, мон та пиме весяк палтури сямен огназ ветлоз ни кожасько вал. Бертондылы чик ӧй оскы. Ой, казыр, казыр, – усьтыр-табыр бакчае потӥз, кеносэ пыриз, емышъёс, пызь пыртӥз.
– Казыр чумерен шыд пӧзьтом. Кен, киярез ачид вандылы али, ӝӧк вылэ пукты. Няне тани ӧз удалты, юмал-маял ӝутскиз. Ӵок ойдо, ӟеч кунолы нянь, пе, медаз удалты шуо...
Озьы нырысь нуналысен ик монэ анайзы аслаз нылыз кадь кариз. Ӝытазе быдэс корка люкаськизы иськавынъёс. Ваньзы милемлы шуныт кыл верало, нош Володя, оло, инмын лоба, лэся. Огзэ зыгыртэ, мукетсэ гор серекъятэ, куинетӥзэ чупа, тыбыраз веша.
Монэ анайзы чумер лэсьтыны косӥз, возьматӥз кызьы погыльтыны. Мон лэсьтӥ. Собере со вань чыжы-выжыоссы азьын ушъяз:
– Ма, та кенэ мынам айбат (кибашлы шуэмез) вылэм. Нырысьсэ чумер погыльтӥз но, учке ай, кыӵе пӧрмытӥз!
Зэмзэ но, ми палан чумер уг лэсьто. Низилиен но лапшаен шыд пӧзьто. Нош Володя дорын самой яратоно сиёнзы – чумерен шыд. Сое соос чырсэн сие. Чырс но лэсьто асьсэ сямен, быректэм йӧллэсь. Соин но, лэся, чумерен шыдзы туж ческыт луэ, сиыса-сиыса вӧёмоно ӧвӧл.
Ваньмы ӝӧк сьӧры пуксим, тодматским. Володялэн иськавынъёсыз монэ туж шуныт, вешаса кадь пумитазы, аслам вордскем гуртам вуи кадь, возьдаськонэ но тӧлӟиз-быриз. Али но мон соосты туж ӟеч син азям пуктыны быгатӥсько, ваньзэс люкасал но ӟыгыртысал, вераськонмы но кемалы тырмысал, вылды.
Быдэс арня милемыз юмшатӥзы Удмурт Ташлыын. Володялэн ӵыжы-выжыосыз кудӥз паймыса, кудӥз чурытгес куараен вазьылӥзы:
— Володь, ма тон чик уд юиськы вал ук. Смотри, чакласькы, выжымы юыны яратэ, эн сӧры вирдэ.
Зэмзэ но, малы ке Удмурт Ташлыын калык тросгес юэ. Сое верало матысь гуртъёсын улӥсьёс но. Калыксы, пе, отын умой, ужась, чылкыт, нош юыны кутско ке, што воргоронэз, што кышномуртэз, гуртсэс адӟытэк юмшало. Озьы верамзылэн зэмез но вань, мултэс куасалтэмез но. Тани Володялэн ӵыжы-выжыысьтыз мон йырзэс ыштыса юись муртсэс чылкак кыксэ гинэ тодӥсько. Соосыз но юэмзы бере ӵаш поттыса ужало, кылем ужзэс ваньзэ лэсьто.
Володя доры нырысьсэ бертылыкумы анайзы мукет кышноослэсь трос ик ӧз юы кадь, но туж чаляк кудӟиз, йырыз сураськиз. Володя соку пуштӥз ук. Отчыозь улытозямы сыӵе лексэ нырысьсэ адӟи. Корка тырос бадӟым куараеныз кесяське:
– Анай, ку тон адями луод ини! Тонэн йырин ведь мон татысь но кошконо луи. Кенэд азьын коть возьдаськы вал!.. Дышетскыкум но со юонэныд йырин копейка но ӧд юртты!
Берло мыным иськавынъёсы веразы ини, Володя, пе, зэмзэ но татысь анаезлы луысагес кошкиз. Удмурт Ташлы школаын ужакуз, урод дышетскись нылпиослэн мумы-бубыоссы доры ветлыкуз, куд-огез синмаз ик шуо вылэм: «Нырысь аслэсьтыд анайдэ дышеты, собере ини – милемыз!»
Озьы ке но, Володя анайзэ жалялляз но. Институтын дышетскыкуз, группазы гужемъёсы лымшор пала ужаны ветлоз вылэм, нош Володя котькуд гужем гуртаз бертылэм, анаезлы турын, пу дасяны юрттылэм. Сыӵе дыръёсты тодаз вайыкуз, анаез шуоз вал:
– Map веранэз, визьмо мынам пие. Сюлмаське мон понна. Нош кытӥяз шыр визьтэм. Одӥг пол турын турнаны мынӥм но пиме ыштӥ. Воз мында турнай ини, кесяськисько, ӧтисько. Ӧвӧл Володе. Куке-соку ини тыпы улысь шедьтӥ: гаӵоло выдэм но инме учкыса кылле, маке пересь мурт сямен ымаз сипыртылэ. Ма кариськод, шуисько, тани чебер нунал ортчоз, турынтэк кылём, ӵуказе нош куазед, оло, зороз. Эн люкеты али, анай, шуэ, казыр султо.
Ма кариз со озьы, ӧйтӧд. Шуисько ук, кытияз мынам шыр визьтэм.
Удмурт Ташлые пиеным кыльыны соин кӧня ке кепырай, но мар карод — городын ке квартирамы ӧвӧл. Нырысь ми туж тупаса улӥм анаеныз. Ӵош пӧраськылӥм, ӵош корка котырын ужам. Володязэ ӵемысь тышкаськылоз вал, кельтӥд, татчы монэ огнаме та вуж корка, не муръёез уг кыскы ни, не укно янакъёс сисьмылэмын. Вуж корка вӧзын ик сылэ вал выль коркалы чупем тынт пужымлэсь бугро, собере сое липизы. Но пушказ кулэ на вал выж, вӧлдэт, гур. Солы луыса корка кема аръёс ӵоже сирота кадь огназ сылӥз, пиосмурт ужась киос ӧз сюре. Соин но, лэся, анайзы ас гуртысь ик пал воргоронлы бызиз, со вуттӥз корказэс, Володя но кӧня ке юрттӥськиз. Выль корка пыронзэс анайзы гожтэм бере, мон солы пӧртэм чильтэр штораос лэзи. Со шумыотыса гожтэт ыстӥз вал. Ми анаеныз кусыпмес ӧм ыштылэ, коньдонэн но пичияк юрттыны тыршылӥ, посылка лэзьялляй. Володяен люкиськем бере гинэ ӝамдэ кусыпмы ышылӥз.
Пиеным ӝыны ар Удмурт Ташлыын улытозь мон, кышномурт, анай сюлэмез валаны тырши. Анайзы юыны кутске ке, жаль но потэ вал. Beдь со вань улонзэ пиосмурт ужез быдэсъяса ортчемын. Секыт война аръёсы бригадирын ветлэм. Но соин ӵош ик нокызьы йырам уг тэр вал, аслым ачим трос пол юан сётъялляй: луэ шат кышномуртлы йырзэ ыштылыны? Но верай ини, анайлы трос ик кулэ ӧвӧл, йырыз шузиме, сямыз чутрак воштӥське. Соин со мыным жаль потылӥз, али но жаль потэ. Озьы ик Володя но жаль потэ: солэн юондыр эшъёсыз чик но солэсь ӧжыт ӧз юылэ, но тросэз али ке но улэп, юон бекчее но ӧз вые. Инмар ваньзэс одӥг кадь уг ворды угось, визь но одӥг кадь уг сёты. Малы соку визьмо нылпиоссэ сыӵе данзы быронэ вуттэ?!.
Удмурт Ташлыысь пичи пиеным шумпотыса кошки — курадӟонэ быриз. Квартирамы ӧвӧл ке но, музъеме гудӟыса чупем коркан ке но – Володяен уло!
Кӧня ке толэзь ортчыса, милемлы квартир сётӥзы. Кык комнатаен. Шумпотыса бӧрдэм ик потэ. Кӧлан койкамы но ӧй вал, кузёосмы сётӥзы вал. Нош кытын кӧлалом асьмелэн квартираямы?
– Гольык выж пул вылын но аслад коркан небыт потоз,— шуэ Володя.
Но квартираямы выжыкумы, коркан сылэ вал корт койка. Володя сое «Комиссионнойысь» басьтэм но мыным «сюрприз» лэсьтэм. Кыӵе шумпотӥ мон со койкалы! Али но сое уг вунэтӥськы.
Пумен-пумен, пичиен-пичиен октӥським. Дядя но меме кӧня ке юрттӥськизы. «Октӥським» шуисько ке но, котькуд арбери понна лек кылъёс кылоно луи мон. Володялы коркан мар вань, кытын пукиськом, кытын сиськиськом – всё одӥг вылэм. Октӥськыны чик уг вала. Книгаосмы соку трос гинэ люкаськизы вал ини, «темной комнатаын» пазяськыса кыллизы. Квартирамы нырысь этажын вал бере, отчы шыръёс но вуылыны кутскизы. Володялы тожо «сюрприз» лэсьтыны малпай. Командировкаын дыръяз «Дась лу!» газетын ужасен Михаил Ивановен книга ӝажы басьтӥм. Дуно ӧй вал али со, уждунлэн ньылетӥ люкетэз мында но ӧвӧл. Жажые чеберак гинэ книгаосты тырӥ, радъяй. Возьмасько ини Володяез. Вуиз, учкиз но соку ик лек куаретӥз:
— Тон мар, уксё быдтыса, оломар кулэтэм макеосты октӥськод!
Верай ини, квартирамы нырысетӥ этажын вал шуыса. Соин ик зӧк, чильпырасьтэм штораос ошыны кулэ луиз. Соку магазинын сыӵе басмаос шер сюро вал, потто ке но – черод люкаське. Мон адӟи сыӵе материалэз, черод басьтӥ но Володя доры редакцие коньдонлы мынӥ. Со монэ кылзӥз-кылзӥз но мырдэм но кызьы коньдон сётӥз. Но ӧжыт сётэм. Озьы кема улӥмы вакчи штораен, укноез гинэ со пытса вал, нош укно улысь батарейкаос гольык адзиськыса улӥзы. Соин ик, лэся, берло коньдонмы тырмымон ке но вал ини, палас но, холодильник но, мукет мебель но ми ог 8—10 ар ортчыса гинэ басьтылӥм. Аръёс ортчемъя, аслэсьтым берыктыны быгатӥгес ни, лэся. Собере доре пырась адямиослэсь но возьыт вал. Олокинэз но вуылӥз, нош коркамылэн шулдырез ӧй вал. Кызьы ке одӥг дышетӥсь пыраз, котырак учкиз квартирамес, номыр ӧз вера. Собере со паймыса адямиослы, пе, шуэ:
– Сыче тодмо писатель, нош улэ огшоры колхозник кадь.
Вылаз дӥськут басьтон сярысь но нырысь пумитъяськылӥз Володя. Чик уг шумпоты вал выль дӥсьлэсь. Нош ачим солы свитеръёс, жакетъёс, картузъёс керттӥсько ке, шумпотыса, куятэк соосты нуллылӥз.
— Ойдо яралоз, зыныз уг пот на уг ай!— серекъялоз вал со, вуж дӥсьсэ выленыз воштон сярысь вераськон потэ ке.
Соин ӵош ик солэн шырытэзлы но паймоно вал. Дораз Татарие бертыкумы вань отпускной коньдонзэ чыжы-выжыосызлы октӥськыса быдтыны дась вал, бадӟым сумкаен саламъёс вайылӥмы. Нош Писательёслэн союзазы ужакуз кӧня квартираосты со сётыны юрттӥз писательёслэн нылпиоссылы! Аслыз ньыль комнатаемзэ олокӧня пол басьтэмез луэ вал. Ӧз, озьы ӧз кары. Мӧйы, тодмо писательёслы юрттӥз, соослэн гожъяськон кабинетъёссы, пе, ӧвӧл. Нош ми весь пӧсь вутэм, нырысетӧ этажын огшоры гинэ кык комнатаын улӧм." Гожъяськылӥз изён валесэ выдыса яке сиськонниын. Пимы пичи на вал, уг вала, атаез доры мынэмез потэ. Одӥг пол, со медаз люкеты шуыса, Володя изён комнатае усьтон ӧслэн сьӧраз бадзым гиря понӥз. Нош пимы озьы но ӧсэз усьтыны быгатӥз. Сыӵе дыръя вожез поттод шат пичилы! Володя сое кияз кутӥз, чырты сьӧраз пуктӥз но комнатаетӥ солань-талань ветлэ:
– Ой, пие, кыӵе бадӟым воргорон луиськод ини!
Шырыт сямыныз ик коня дуно дырзэ быдтылӥз егит гожъясьёслы. Вань сюлэмзэ сётыса соослы валэктылӥз гожъямъёсысьтызы ӟечсэ но тырмымтэоссэ. Мон умой тодӥсько, Володялэн шырытэзлы, капчи киызлы луыса, туннэ тросэз егит гожъяськисьёс йыг-йыг пыд йылазы сыло.
Верай ини, мон Володялэсь сизьым ареслы егит вал шуыса. Соин но, лэся, нырысь аръёссэ солэсь гинэ кылзӥськыса улӥ. Аслам малпанэ но ӧй вал ни кадь. Володялэн гинэ гожъямез ке мыне вал, со гинэ дунне вылысь самой визьмо кылбурчи потэ вал. Ма, Володя ачиз но ассэ озьы возьматыны быгатылӥз. Квартираямы котькуд нунал сямен кылбурчуръёс вордскылӥзы. Нырысь ик соосты Володя мыным лыдзылӥз, яразы-а шуыса юалляз. Куддыръя кулэ рифма уг ке шедьты, вазёз вал ини:
– Кылзы ай, тани кыӵе чебер чур гожтӥ, нош пумысьтыз кыллы нокызьы рифма уг шедьтӥськы. Малпаськы ай.
Мон йырме озьы но, тазьы но тӥясько, огшоры кылъёсты гинэ шедьтӥсько. Со куспын Володя шумпотыса корка тырос кеське ини:
– Сюриз! Ох, кыче жингрес рифма шедьтӥ! Кылзы...
Собере кутске лыдзыны, ваньзэ вунэтэ. Таӵе дыръёсты мон туж яратӥсько вал. Кылбур омырен гадь тыросам шокалляй.
Гуртын Володяез номыр карыны ӧй косылы. Мед гинэ гожъяськоз. Магазинъёстӥ ветлон, сиён дасян, мисьтаськон, пимес утялтон, сое яслие, собере садике, больницае нуллон – ваньзэ мон ас вылам басьтӥ. Йырам кылбур гожъян ӧй вал ни. Ма, кызьы мон дӥсьтом кыӵе ке «шузи» кылбуръёс гожъяны сыӵе бадзым, визьмо, дано писатель вӧзын!
Но Инмарлэсь гожтэмзэ чушыны уг луы вылэм, шуак-шуак, малпамтэ шорысь йырам чуръёс лыктылӥзы, соосты бумага вылэ гожтытэк, сюлэм ӧз буйгалля. Соку ужасько вал «Советской Удмуртиын» гожтэтъёсъя отделын. Уж трос ӧвӧл, пук но гожъяськы. Собере ӵош ужась нылкышноос но монэ куаретылӥзы, возьытэ но вуттылӥзы. Мар-о, пе, тон аслэсьтыд таланттэ озьы юнме быдтӥськод. Пиосмуртъёс валалозы шат сое. Туала кышномурт ачиз понна но улыны кулэ. Пыр али дышетскыны университетэ. Возьматы Володяедлы, тон но сокем шузи ӧвӧл шуыса. Умой-умой малпаськыны кутски: оло, зэмзэ но эскероно. Верай ини, мон со вакытэ улӥ Володялэн гинэ малпанъёсыныз, веднам мурт сямен, уйвӧтын ветлӥ кадь. Асме ачим чик ӧй дунъялля. Пумен-пумен, кылбурысь кылбуре гожъяськонын пичи ке но быгатонме шӧдыны кутски. Сое шӧдыны юрттӥзы газетын ужасьёс: кулэ дыръяз ушъязы, пӧрмымтэзэ лякытэн валэктӥзы. Каллен-каллен, оген-кыкен «Советской Удмуртиын» кылбуръёсы потазы. Но «Молот» журналэ сётыны возьдаськисько вал. Отын редакторын ужаз Флор Васильев – Володялэн эшез. Солы но кылбуръёсы уз яралэ кадь потэ вал.
Одйг пол выж миськисько. Шуак вал сярысь чуръёс лыктӥзы йырам. Миськисько, нош чур лыктэ – гожтӥсько. Изён интыез но азь шорез миськытозь, быдэс кылбур кылдӥз. Пырон палэз гинэ кылиз на миськыны. Ӵапак соку Володя вуэ. Лэчыт синмыз соку ик усе вуриськон машиналэн тумбочкаез вылын кыллись бумага лист вылэ.
– Map та? – юа.
– Йырам макесо лыктӥз но тани гожтӥ, – сюлмы золгес жугиськыны кутскиз.
Володя кутӥз со листэз но лыдӟыны кутскиз.
– Умой, умой. Нош татӥзэ мон тазьыгес карысал.
– Уг тупатъя косэмедъя, аслам кылбуре уз луы ни.
– Ма мон одӥг кылзэ гинэ тупатыны косӥсько, кылемез умой.
– Уг, уг тупаты.
— Ачид тодӥськод, – киыныз шонтӥз но сиськонние ортчиз, собере шуак отысь потӥз:
– Тодйськода, та кылбурдэ «Молотэ» поттыны умой вылэм. Возаз эшшо коня ке гожты но пырак Флорлы ну.
Мон озьы ик кари. Берло Володя вераз, Флор Иванович, пе, оскымтэ, со кылбуръёсты мон гожтӥ шуыса, вӧзаз тон коня ке кидэ нюртылӥд, дыр, пе, шуиз. Чутрак пумит кылъёс верамез бере гинэ, пе, оскиз кадь.
Та учыр бере Володя мон шоры мукетгес учкыны кутскиз. Гожъяськон удысме но лушкем чакласа улӥз, аслым номыр ӧз куаретылы ке но. Со сярысь мон кылылӥ палэнысен ини. Володялэн мыным осконэз тужгес но кылдӥз кадь потэ уни-верситетэ дышетскыны пырем берам. Нырысь пумит вал мынам дышетсконэлы. Табере али валасько ини, малы со пумитъяське вылэм. Мон ведь редакцие ужаны лыктӥ тямыс класс образованиен. Дас одӥгез быдтӥ городын ӝыт ужась школаын. Малпаз, дыр, возьытэ гинэ вутто сое аслам визьтэменым, дышетскыны пырыны уг быгаты. Нош малпамме одно ик быдэсто шуыса вераме бере, Володя мыным юрттыны кариськиз. Диктантъёс, сочиненное гожъясько но солы учкыны сётылӥсько. Пӧрмемын ке, пичи мурт кадь шумпотэ вал. Тодэ ваёнам мон трос пыртылӥсько «пичи мурт кадь шумпотэ» кылъёсты. Но со озьы ик вал. Володя кадь шумпотыны быгатэмез мон татчыозь нокинлэсь ӧй пумита на. Озьы ик Володя кадь уродъяськемез но. Вожез ке потэ, коркан гудыри гудыръя кожалод, чида гинэ. Мынам сыӵе дыръя синкылиосы чаляк потылӥзы. Володя адӟоз но шуак чалмоз, дорам лыктоз, пельпумам йӧтскоз, шузи мон, шузи шуыса зыгыртоз. Сыӵе дыръя со кадь ӟеч адями дунне вылын ик ӧй вал кадь. Туж вожпотон дыръяз но кизэ одӥг пол но мон вылэ но, пимы вылэ но жуткамез ӧвӧл. Самой лек, шуш кылыз вал «японский бог», «вир синкылиед киськоз».
Улон со улон ини. Жалятэк жуге. Лябъёсыз чаляк куасалско, золъёсызгес нуналысь нуналэ нюръясько, уло.
Володялэн улонысь вазь кошкемез сярысь оломар но верасез вань. Монэ но янгыш каро, со вакытысь системаез но. Кудӥз шуэ, укыр вазь пе, Володяез вылӥе жутӥзы, соин ик со сыче зол шуккиськыса усиз. Табере котьмар вераны луэ. Но мон оскисько Инмарлэн адямилы улыны кӧня ар висъямезлы. Озьы кылдэм, дыр, ини Володялы музъем вылын улыны: бадӟым дан но шузи-мази луон. Бен, бен, сое тросэз берло шузиез кадь шумпотыса серекъязы, мыскыллязы. Нош адями висе вал бере, сое сокем сюлмаз пыртыны ӧз но быгаты, дыр, кадь потэ. Быгатысал ке, мон малпасько, кужым шедьтысалыз ассэ кутыны.
Володяен улонэ мынам люкиське кык люкетлы: туж шудо но туж шудтэм. Шоретӥез ӧй вал. Ачиз но со шоро-куспо адями ӧй вал угось. Улонмылэсь кыкетӥ люкетсэ тодам но ваеме уг поты. Со вал кӧшкемыт пеймыт коркан векаса улон.
Верай вал ини, Володя шуак-дуак юыны ӧз кутскы шуыса. Али сямен ик, кызьы пиос юо, эшъёсыныз одӥг жӧк сьӧрын пукылӥзы, улон-вылон, гожъяськон сярысь вераськылӥзы. Мон эшъёссэ тодӥсько вал. Соин но, лэся, сокем ик урод малпанъёс ӧз лыктэ юэмзэс адӟыса. Ваньмыз юо. Нырысьсэ секыт куректонэ уси Володялэн Флор Васильевез пӧямез бере. Соку соос Писательёслэн союзазы ӵош ужазы. Быдэс арня юыса гуртын пукиз, нош Флор Ивановичлы командировкае ветлӥ шуиз. Соку нырысьсэ зол-зол керетӥм, нырысьсэ синмы усьтӥськиз, мурт адями шоры кадь учки, татчыозь данъяськон кузпалы юрӟым потыны кутскиз.
Со учыр бере, кӧня ке улыса, нош арня юыса кыллиз, собере эшшо но эшшо. Озьы ке но, сое ужысь ӧз куштэ. Флор Ивановичлэн бурд улаз улӥз. Созэ но вераны кулэ: Володя ужаны быгатэ вал. Кык но, куинь но мурт интые ужалляз. Соин но, лэся, сое Флор Васильев вӧзаз возиз.
Володя син азьын воштӥськыны кутскиз: керӟег, вожъяськись, алдаськись, ассэ гинэ яратӥсь луиз. Вина сяна, олокыӵе но изён таблеткаос юылэ вал – кӧлэме, пе, уг луы. Ма, кызьы луоз, нунал лумбыт юыса изь но эшшо уйзэ кӧл на! Больницаын оско вал, лэся, кӧлыны быгатымтэезлы, соку ик кужмо таблеткаос сёто. Пумен-пумен со таблеткаос но вина асьсэлэсь лэсьтйзы: тазалыксэ но быдтӥзы, лулзэ но воштӥзы.
Тямыстонэтӥ аръёсы юись адямиез соку синйылто вал вылысь кивалтӥсьёс. Володяез но ужысьтыз куштытӥзы. Ну, малпасько, табере-а визьмаськоз ини! Ӧй тышкаськы, пук, шуи, гуртын гожъяськы, эн гинэ юы ни.
Но «шутэтсконэз» кемалы ӧз кыстӥськы. Табере ини мон бызьылыны кутски юрттэт курыса Писательёслэн союзазы но мынӥсько, пеллёос дортӥ но ветлӥсько. Со вакытэ Феодосиын гинэ эмъяло вал али кодирование амалэн. Отчы мыныны Володяез курисько. Соглаш луиз вал собере ӵуказеяз сазьтӥськизгес но шуак шуэ:
– Нокытчы уг мыны, ачим дугдо.
Нош оскисько умоезлы. Озьы ортчизы aрняос. Володя мургес но мургес выиз. Отысь поттыны мынам кужыме ӧз тырмы, ӵошен выеме но ӧз поты. Аслам улонэ сярысь паськыны кутски. Мыным ведь куамынлэсь ортчемын али, тазьы шат пырак улонме векатом. Кошконо, синмы но медаз адӟы ни, пельы но медаз кылы ни та адямиез. Пиме гуртэ мемелы но дяделы кельто но кытчы ке уй пал шаеръёсы кык арлы ке но кошко. Соку тросэз озьы ветло вал.
Нокытчы кошкыса ӧй вутты, мукет воргоронэн пумиськи, ог-огмес яратӥм, ӵош улыны карись. Но Володяез огназэ кельтыны жаль потэ на. Солы мон ваньзэ верай но шуи:
– Юондэ куштӥд ке, мон тонэн ик улыны кылё.
– Мар-о мон кыче ке алкоголик шат!— вожез потыса кеськиз.
Мон киыным шонтӥ. Кыль шуи аслад висёнэныд, нош мынам адями сямен улэме потэ на... Но ӧз кылды таяз учыре но адями сямен улыны. Огнам кыли. Гогыедлэсь вылӥе тэтчын уг яра вылэм.
Али мон трос малпаськисько ортчемез сярысь. Трос юанъёсылы нокызьы но валэктон уг шедьтӥськы, пеймыт нюлэскы йыромем мурт кадь ветлӥсько.
Малы милемлы Володяен дунне вылын пумиськоно вал? Гороскопъя кыкнамы ик вордӥськемын лев кизили улын. Кылэме вань, сыӵеос, пе, улыны кылдэмын ӧвӧл. Кин тодэ ини созэ. Но туж умой чаклано ке, зэмзэ но милям сямамы трос одӥг кадез, гожъяськон почеркмы но (букваос шуисько) тупало. Ваньзэ сое малпаса, таӵе кылбур гожтӥ:
Одӥг вал асьмелэн Инмармы,
Вӧсьмы но Кылчинмы,
Одӥг вал асьмелэн Шундымы,
Лулмы но сюлэммы.
Яратонмы но асьмелэн одӥг вал:
Сабырез валасьтэм эркын тӧл.
Тӧлпери луыса со ӝутскиз,
Ӵош пуктэм коркамес куашкатӥз...
Одӥг вал асьмелэн Инмармы,
Яратонмы но одӥг вал.
