Ӟечбуресь!
Туннэ среда. Куазь шузи-мазигес улэ: я шунды, я тӧл, я зор. Толон уж бере машинаен ветлӥм губилы. Одӥг сетка лӥялгуби вайи, жарить карыса сии, одӥг пичи банкае мариновать кари. Уж уно. Весь «Детский мире» ветлыны дасяськисько. Зарплата басьтӥ ке, пилы мар но со келяло ни. Мар басьтыны косыса гожты, ява.
Подваламы кезьыт. Котькуд ӵукна пуэд луэ. Миша агай весь корказьзэ лэсьтэ, выль пул вӧлдӥз азбараз. Гурзэс воштӥллям ини, тани-тани асьмелэсь, пе, ремонт каром. Собере выжез буялом. Соку тӥни быдэс арнялы командировкае кошконо луоз.
Бакчаязы оломарзы ик ӧвӧл кадь. Яблоксы вуымтэ на, помидорзы сӧриське. Чиязэс куд-ог сиисько ик. Валя апай уг юы ни, тоже давлениен курадӟем но – пыӵам, лэся. Миша агай весь ужа, кокаське. Ачим ӝытъёсы али Лермонтовез лыдӟыса вырисько. Шыд уг пӧзьтӥськы на, картошка но, маар но ӧй басьты на. Сюкась лэсьтӥ. Пуке, пуке, уг вуы. Кезьытэн-а мар-а?
Ужын шулдыр. Нош уж бере но арняе, субботае туж мӧзмыт. Коть ошиськыса кул, ява. Серекъясько. Ну, ничего. Дышом…
Я, ӟеч. Саламен Володяды. Ваньдэс чупасько. Эн мӧзме.
Август, 1971 ар.
Ӟечбур, Галие, анай, Вовик!
Туннэ лумбыт бызьылӥськиз, костюм утчаса. Покчиосыз ӧвол. Кызь куать размерзэ басьтӥ. Сӥзьыллы покчи изъыос но ӧвӧл. Басьтӥ ини толлызэ. Тупалоз, шуизы. Али но кезьыт дыръя кышет вылэ керттылоды. Улӥсько азьло кадь ик. Кылем арняе куать нуналлы командировкае Киясовое ветлӥ. Арня нуналэ бертӥ. Мынӥськом кык-куинь нуналлы колхозэ, картошка бичаны. Иванъёс но колхозэ кошкиллям, быдэс толэзьлы. Пока соос уло Палагей апай дорын. Доразы ветлӥсько ик. Алигес «Нева» но «Москва» журналзэс вайи. Соослэн «Здоровьезы» вань. Мон ысто сизьыметӥ номерзэ, ява. Квартир утчаны куриськон сётӥм «Удмуртской правдае». Витез-куатез лыктӥзы, асьмелэсь но ӟечез ӧвӧл. Оло, сюроз на. Сюриз ке, мукет интые потом, дыр. ,
Кузёос кемалась ини уг юо, улмозы сисьме, нумырӟе, туж куректо. Ӝытъёсы книга лыдӟисько, чыры-пыры гожъяськисько. «Комсомолецын» кык кылбуре потӥз соос пӧлысь. Газетъёсы— гуртын. Byоно арняе Глазове командировкае мыном нош ик — быдэс арнялы, а то татын туж мӧзмыт, уксё но уд потты. Пальтодэ, Гали, командировкаысъ бертэм берам ысто ини. Али октӥ пилы костюм но изьы. Дальнюк ӵужмуртъёслы трансформатор учки, али ӧвӧл.
Сокем дыртӥсько, тани-тани почтаез нуозы. Нош уж бере квартира учкыны ветло. Оло, маке сюроз, ӧз ке, учком ни, ум быре.
Я, ӟеч, чупасько ваньдэс. Газетъес ӵуказе ыстыны тыршо, ява.
Володяды.
7 сентябрь, 1971 ар.
